KUANZA KATIKA ROHO, KUMALIZIA KATIKA MWILI?

KUANZA KATIKA ROHO, KUMALIZIA KATIKA MWILI? Ni kitabu kinachofunua hatari ya mwamini kuanza safari ya wokovu, huduma na ukuaji wa kiroho kwa kumtegemea Roho Mtakatifu, lakini baadaye kuhamisha utegemezi huo kwenda katika nguvu, maarifa, uzoefu, mbinu na uwezo wa kibinadamu. Hatari hii inaweza kumfanya mtu aendelee kuomba, kuhubiri, kuhudumu na kufanya shughuli za kiroho, huku ndani yake utegemezi kwa Mungu ukipungua taratibu. Kitabu kinaonyesha kwamba “mwili” unaweza kujificha ndani ya maisha ya kiroho bila kuonekana kwa urahisi. Hatari hiyo haiishii kwa mtu binafsi; inaweza pia kuingia ndani ya Kanisa. Kanisa linaweza kuwa na viongozi, mifumo, mipango, teknolojia, mafanikio, miradi na shughuli nyingi za kiroho, lakini taratibu kuanza kutegemea vitu hivyo kuliko kumtegemea Mungu. Kitabu kinaonyesha dalili za hali hii na mifano ya kibiblia inayotusaidia kutambua jinsi utegemezi kwa Mungu unavyoweza kubadilishwa na kujitegemea, na jinsi hilo linavyoweza kuathiri maisha ya mwamini, huduma na mwelekeo wa Kanisa. Hata hivyo, kitabu hiki si cha kufunua tatizo pekee, bali pia ni mwito wa kurejea katika utegemezi wa Mungu. Kinaonyesha kwamba njia ya kujinasua si kujitahidi zaidi kwa nguvu za mwili, bali ni kurudi katika neema, Neno la Mungu, maombi, utii na uongozi wa Roho Mtakatifu, tukimrudisha Kristo kuwa chanzo na lengo la maisha yetu. Swali kuu la kitabu ni: Je, bado tunamtegemea Mungu tuliyemtegemea tulipoanza, au tumeanza kutegemea kile alichotupa kuliko kumtegemea Yeye mwenyewe?